25 სექტემბერს თსსუ-ის ი.ქუთათელაძის ფარმაკოქიმიის ინსტიტუტში ფარმაცევტთა საერთაშორისო დღე აღნიშნეს.
ღონისძიება გახსნა აკადემიკოსმა ეთერი ქემერტელიძემ, რომელმაც ქართული ფარმაციის ისტორიასა და განვლილ გზაზე ისაუბრა. ასევე სიტყვით გამოვიდნენ თსსუ-ის ი.ქუთათელაძის ფარმაკოქიმიის ინსტიტუტის დირექტორის მოვალეობის შემსრულებელი - ლაშა მსხილაძე და ფინანსური დირექტორი - ვასილ ჭეიშვილი, რომლებმაც ინსტიტუტის მიღწევები და სამომავლო გეგმები გააცნეს საზოგადოებას.
ღონისძიებას ესწრებოდნენ საქართველოს ფარმაცევტთა ასოციაციის წევრები, თსსუ-ის ი.ქუთათელაძის ფარმაკოქიმიის ინსტიტუტის მეცნიერ თანამშრომლები და თსსუ-ის ფარმაცევტული ფაკულტეტის წარმომადგენლები.
ღონისძიების ფარგლებში გაიმართა დაჯილდოება, სადაც ფარმაცევტებს ქართულ ფარმაციაში შეტანილი წვლილისთვის მედლები გადაეცათ.
